Наскоро три стратегии за соработка на општините со граѓанските организации

Во септември се одржаа првите состаноци на работните група за подготовка на стратегии за соработка на локалната самоуправа со граѓанските организации во трите пилот општини, Дебар, Јегуновце и Битола. Работните групи се дел од процесот на креирање институционален механизам за соработка на ЕЛС со граѓанскиот сектор и развивање на стратегија за соработка и вклученост во креирањето и донесувањето на локалните политики.

Работните групи се составени од двајца претставници на општината, советник и лице задолжено за соработка со граѓанските организации и двајца претставници на локалните граѓански организации. Со учество на сите засегнати страни уште во процесот на подготовка на стратегијата ќе се обезбеди чувство на сопственост на стратегијата и ќе се придонесе кон одржливост во процесот на спроведувањето.

Работните групи ќе одржат вкупно четири еднодневни работилници и по два форуми во секоја од трите општини на кои поголем број граѓански организации ќе имаат можност да дадат придонес во подготовката на стратегијата.

Се очекува работните групи, со помош на експертите да подготват предлог стратегии за соработка со граѓанските организации во трите пилот општини. Стратегиите ќе бидат промовирани во рамките на ЗЕЛС ЕКСПО во ноември 2011 г., со што резултатите и искуства од пилот општините ќе се споделат со другите општини.

Подготовката на стратегиите е дел од проектот„Граѓански дијалог на локално ниво" финансиран од Европската Унија од ЕИДХР.