Македонски центар за меѓународна соработка - МЦМС

Објавеното истражување има друга намена и апелираме политичките партии да не го злоупотребуваат, се вели во реакцијата на Македонскиот центар за меѓународна соработка. По завчерашната изјава на координаторот на пратеничката група на СДСМ, Јани Макрадули, во која посочува дека рејтингот на ВМРО-ДПМНЕ драстично опаднал на 19 проценти, во МЦМС појаснуваат дека целта на извештајот е општествената одговорност на граѓаните.

Најновото истражување на МЦМС кое работеше на испитување на степенот на општествената одговорност на граѓаните покажа пад на рејтингот на владејачката ВМРО-ДПМНЕ, а промената на процентите одат во прилог на СДСМ. На прашањето „Која политичка партија ја чувствувате како своја“ 19,3 од испитаниците одговориле дека тоа е ВМРО-ДПМНЕ, додека 13,2 процента се изјасниле за опозициската СДСМ. За споредба, претходната сондажа на ИРИ покажа дека ВМРО-ДПМНЕ има поддршка кај 26 проценти од испитаниците, додека нејзиниот опонент СДСМ имаше 11 проценти.

Сите партии од големата четворка во Македонија имаат подеднакво слични шанси за победа, доколку утре би се одржале избори. Вака вели последната анкета реализирана од невладината МЦМС во соработка со Институтот за социолошко-политички истражувања.