Македонски центар за меѓународна соработка - МЦМС

Заврши форумскиот процес во Радовиш и Конче. Проектот за набавка на две мултифункционални возила (трактор со цистерна и специјален камион со цистерна) успешно се спроведе, а возилата стигнаа кај јавните комунални претпријатија „Плаваја“ и „Лакавица“.

На осумте сесии на меѓуопштинскиот форум учествуваа повеќе од 750 граѓани. Од октомври 2009 година до крајот на март 2010 година тие дискутираа за проблемите на двете општини поврзани со водоснабдувањето и отпадните води. Ги развиваа почетните идеи во проекти, дебатираа за нив, ги подобруваа и на крај гласаа. Најмногу гласови доби проектот „Техничка опрема за одржување на канализациската мрежа“. Буџетот за овој проект изнесуваше 10.834.455 МКД. Швајцарската агенција за развој и соработка (СДЦ) донираше 6.000.00 0 МКД, а остатокот го обезбедија општините Радовиш и Конче и јавните комунални претпријатија.

Им олесни на вработените во „Плаваја“ и „Лакавица“. Проблемот со застарената опрема или недостатокот на било каква опрема за одржување на канализациската мрежа сега е надминат. Карактеристиките на двете возила овозможуваат, освен за првобитната намена, тие да се користат и за зимско одржување на улиците, интервенции во случај на пожар, собирање комунален цврст отпад итн. „Олеснувањето не е само за нас“, велат тие, „нашите услуги ќе се подобрат, а граѓаните ќе бидат многу позадоволни“.

Форумскиот процес им овозможи на граѓаните на Радовиш и Конче сами да одлучат за што ќе ги употребат средствата од СДЦ, како и дополнителните средства од општините. Низ овој процес, тие учествуваа во креирањето на одлуките на нивните општини. И оние поскептичните и оние другите се согласија дека ова е добро искуство за вклучување на граѓаните во креирањето на политиката на нивните општини.

Форумскиот процес во Радовиш и Конче го водеше МЦМС.