Македонски центар за меѓународна соработка - МЦМС

Околу 80 граѓани учествуваа на првата форумска сесија која се одржа во Берово на 7 октомври оваа година. Во Берово по втор пат се реализира Форуми во заедницата, но во овој циклус со однапред дадена тема „Буџетски форумски процес“.

На присутните, освен претставниците на МЦМС и Единицата за координација на форумите им се обрати и градоначалникот на општина Берово, Драги Наџински. Тој рече дека значењето на овој проект е големо, поради фактот што граѓаните дирекно учествуваат и имаат можност да одлучуваат што ќе се направи со предвидените средства за овој проект, а исто така и да влијаат на буџетот на општината. Тој ја нагласи отвореноста на општината за реализација на идни вакви проекти кои ќе бидат од интерес на граѓаните со цел да се одржи добрата соработка меѓу граѓаните и општинската администрација.

Граѓаните активно учествуваа во текот на презентацијата на структурата на буџетот, како и приоритетите за развој на општината за 2010 година.

Втората форумска сесија се одржа на 14 октомври 2009 година. На неа беше дефинирана стратешката област за следната година – Подобрување на инфраструктурата во централното градско подрачје во Берово. Присутните имаа можност да слушнат и да разговараат за прегледот на планирани/реализирани приходи на општината за 2009 година како и за проекциите и структурата на приходите за буџетот во 2010 година.

На третата форумска сесија, на 21 октомври 2009 година, работната група ги презентираше предлозите, а потоа беа усвоени од страна на форумот. Граѓаните слушнаа и дискутираа за расходите по надлежност особено во делот на комунални дејности и заштита на животна средина и природа.

Следната форумска сесија во Берово ќе се одржи на 4 ноември 2009 година.