Македонски центар за меѓународна соработка - МЦМС

Даниела Стојанова од Македонскиот центар за меѓународна соработка (МЦМС) е избрана за член на Советот за статистика на Република Македонија. Собранието во април 2012 г. го избра новиот состав на Советот, во кој се уште 14 други претставници на различни сектори и институции.

Советот за статистика на Република Македонија претставува советодавно и стручно тело на ДЗС со мандат од четири години и се состанува еднаш месечно. Советот расправа, дава мислење и предлози за програмата, стратегијата и извештаите за работа на Државниот завод за статистика (ДЗС), потоа за законски решенија, како и за модернизација и рационализација на државната статистика. Првата конститутивна седница на Советот беше одржана на 28 мај 2012 г., на која членовите се запознаа со делокругот на работа, задолженијата, како и со тековните и идните активности на ДЗС. Следната седница ќе се одржи на крајот од јуни, на која ќе се усвои програмата за работа на Советот и други работни документи.