Македонски центар за меѓународна соработка - МЦМС

Седмата форумска сесија од програмата „Форуми во заедницата“ во општина Делчево се одржа на 26 ноември 2014 година. На граѓаните им беше презентиран целокупниот форумски процес, а потоа од страна на локалната самоуправа беа презентирани резултатите од реализираниот проект: „Изградба и уредување на јавни површини“. Со проектот е направен и уреден парк помеѓу улицата „Кеј на ослободување“, реката Брегалница, спортската сала и реката Габровчица. Паркот има пешачки патеки и партерно хортикултурно уредување, поставени се клупи за седење, фонтана, корпи за отпадоци и јавно осветлување.

„Искрено се радувам за уредениот парк, бидејќи според мене паркот беше навистина неопходен за граѓаните на општина Делчево, а посебно за луѓето кои што живеат во тоа населено место,“ изјави Љупчо Христов, учесник на форумот. И Сребран Ѓоргиевски е задоволен од успешното завршување на проектот. „Конечно граѓаните на општина Делчево добија современ и уреден парк што ќе биде користен од страна на граѓаните. Благодарност до општина Делчево, МЦМС и Швајцарската агенција за развој и соработка кои беа главни иницијатори и поддржувачи за реализација на проектот.

Проектот ќе придонесе кон подобрување на условите за живот на граѓаните. Со уредувањето на овој запуштен дел од градот се подобрува состојбата со животната средина, им се овозможува на граѓаните да се дружат, децата да се рекреираат и на тој начин да имаат поквалитетен физички и здравствен развој.

Во проектот беа вложени вкупно 5.788.902 денари од кои 2.400.000 денари беа обезбедени како донација од Швајцарската агенција за развој и соработка, а 3.388.902 денари се општински средства.

На сесијата беше презентирана и информација за преземените активности и состојбата на препораките кои граѓаните му ги предадоа на Градоначалникот на општина Делчево на петтата форумска сесија.